BB床+感冒 (33W)

2月26日

星期六, 襯住HSBC咭最後一周回贈, 去吉之島買埋D BB野。首先買張0/3 baby Clara 床, 比上次聖誕8折, 今次得9折, 但都要買啦~~ 要3月尾先送貨, 都差唔多喇。

跟住跟CHECKLIST執埋D野, 所有都係9折ONLY! 買左 (左起)

我用的:
沖洗瓶 $25.2
乾洗髮劑 $89(唔知到時O岩唔O岩用, 但買定先)

B女的:
奶瓶刷 $23.4(因為佢平, $26 9 折)
大毛巾 $69.9 (之前淘寶買左條大紗巾, 因為要2條, 就買多條毛巾, 有竹纖維造的, 好滑; BB部有一條又係竹纖維要$117, 太貴。MINIMOTO折左$6x, 100%cotton, 所以我地走左去家品部揀左呢條, 但無折)
安全扣針 $7.6
指甲鉗 $9.3
吉之島牌BB用螺旋紋綿花棒 320枝 $29.9 (無折)

買埋今次就8899喇, 想買一個床鈴, 但得Fisher price 要五百幾蚊, 都係遲D先...

耳探諗緊買平平地的萬寧牌好無, 因為呢D野都一年用好少次...

2月27日

昨晚, 好似更多病病地。半夜喉嚨好痛......今朝仲有痰....捱左幾日, 今朝去睇醫生喇。同醫生講我33W, 佢話我個肚咁細O既!!! 幫我量我血壓, 正常。因為我只係睇喉嚨, 我都無同佢講太多....佢叫我食多D野, 唔好出街, 休息多D, 寫左聽日假紙俾我, 睇下聽日有無好D先用啦....

之後去藥房買埋棉花球, 同樣60PCS, 只係$5包, 藥房D野真係平好多!!

請辭 (33W)

距離產假只有一個多月, 決定呢個星期點都要同大經理話要離職.........

2月22日

今日訓醒, 喉嚨開始唔舒服, 唔知係鼻水倒流定食得熱氣野多 (上星期食了薯條, 昨晚食了炸乳鴿), 好想唔返工。

返到去仲有少少發冷, 但食LUNCH後又好番少少.....

今晚要上一個美國同事做的PRODUCT TRAINING, 8PM先開始, 好慘要OT! 所以我同另外副經理和另一位同事六點幾就出去食DINNER, 席間我好想同佢地透露我會辭職, 但最後都無講。

完左TRAINING, 9:45PM先走, 好彩痴到副經理的老公車坐去到美孚西鐵, 快左好多回家!!車上我忍唔住同佢講左, 佢唔算好驚訝, 反而佢同我講, 如果佢有左, 佢都會唔做....

佢叫我快D同經理講, 等佢快D安排。

2月23日

可能琴晚太早食DINNER, 份量又唔多, 今朝五點就餓醒!!! 訓番著時已經差唔多要起身, 好累。

今日LUNCH, 副經理約埋兩位相熟的同事食LUNCH, 我同佢地講埋辭職, 其中一位同事認為, 因為我都係俾媽媽親手湊, 所以會想自己湊, 我覺得其實真係有影響~

同三個人講左, 自己都無咁緊張。諗住下午返去同經理講, (因為HR已經催了我兩次交產假申請表.............), 最後太忙, 都係講唔到。

2月24日

訓番一覺好, 喉嚨好番少少, 希望快D自己會好番!!

今朝九點幾, 走入去簽產假紙, 同經理講埋我的決定。佢好驚訝, 仲問我諗清楚未.....佢話覺得太偉大同好大犠牲, 因為之後好難再搵番相類似的工, 生活圈子又會變得狹窄, 呢樣野我都明白同預左....佢自己有兩個女, 但從來都無諗過唔做。至於點同HR計30日通知期, 佢幫我問完再傾。

講左之後輕鬆好多, 產假由4月6日開始, 仲有個幾月咋....

婚宴+睇戲 (32W)

星期六, 出旺角BABY OUTLET用之前母乳講座$140的券買野, 因為有指定牌子, 就算上網睇左都唔知買乜好.....最後買左一個吹氣浴盤, 細細地(71"長), 唔知可以用幾耐, 或者大D先買一個膠盆, 呢個用黎玩水?? 特價$159。

另外, 買埋MEDELA奶泵的喇叭備用和一枝母乳用的羊脂膏。

旺角真係好多人, 而且雨濕濕, 好快就走喇。

下一站係出席中學同學在尖東的婚宴, 呢一個係我第一個中學同學結婚的婚宴...唔夠七點去到, 圍數唔多, 可以同佢影到兩次相。因為她只請了我和另一位同學, 我們被編至女家第2圍, 好有面子!! 佢致詞時仲請我地上前....我大住個肚, 個個都睇到喇。

呢餐飯就係食到好飽, 可能係新郎哥識酒樓的人關係 ?? 翅好大條, 仲有原隻非鮑, 因為我圍有4個小朋友, 佢地唔食鮑魚, 我就食左兩隻....條魚又好大條, 最後除紅豆沙, 仲有合桃酥, 桂花糕, 囍飽, 大家都叫好飽。可能因為見到我的肚, 席間D親友大談媽媽生仔湊仔經, 一位自己因患B 鏈球菌小產的經歷, 另一位就講自己懷孖女時有妊娠毒血的苦況....懷胎十月真係唔容易 ....都學左唔少野!!

有一位媽媽話我的肚低, 估我係女呢!! 個個都話第一個生女好, 唔會教壞細果個。

星期日, 去睇早場3D潛行深淵, 有D緊張的部份, B女不斷踢。可能戴住3D眼鏡, 之前一晚又夜訓, 睇完好累呢。

今次睇埋, 下次唔知幾時先會入戲院喇, 可能要幾年後?

醫院檢查 (32W)

今日上午約了由健康院轉介去醫院睇產前, 11:30AM。因為下午要返工, 所以我都早左少少11:20AM到, 排隊登記, 前面果人仲係11:00AM!!

首先驗尿, 醫院要自己拎住條試紙驗, 姑娘仲俾個新樽仔我, 話呢個方便D, 真好!! 今次條試紙結果同印象有D唔同, 果然話我有少少糖尿!! 問我係咪食左早餐留的, 我一向都係咁留啦.... 唯有驗多次!!

體重58.8KG, 比個幾星期之前58.9KG, 即係無重過。血壓正常, 之後留多次小便, 今次無事喇~ 出去等叫名, 就係咁, 等左一個鐘九個字先到我, 當時已經一點二, 只剩下幾位媽媽, 好彩我唔係最後一個。(D醫生點幾都無有得食LUNCH, 真辛苦, 2點又開始下午診症)

今次係一個男醫生, 唔駛坐底, 即刻叫我上床聽胎心跳。佢按下我的肚, 話BB未轉頭, SIZE OK (但佢好似無用尺!) 聽胎心跳, 問我聽唔聽到就落床喇, 點解無得照超聲波?!

原來要再約2星期後 , 即34W時返去照, 之後一日再見醫生, 即係我2日都要去醫院喇...

呢家32W未轉頭, 醫生話OK, 應該34W要轉喇。下次照就知係唔係胎盤前置, 如果係就要開刀, 仲要第二日入院待產, 因為胎盤前置有出血的危險, 希望B女呢兩個星期就調頭同升左上去啦.....我唔想開刀同咁早入院呀。3月2日呢個日子好關鍵。

離開醫院已經點半, 醫生寫左全日的到診紙俾我, 我順勢請埋下午假, 食埋LUNCH回家了。

揹帶, 奶泵 (31W)

2月12日

雖然係星期六, 但都好早醒。呢排無用大攬枕, 因為有D熱, 又無堅持左側訓, 好多時都係平訓, 唔知係咪咁, 訓醒個PAT PAT好痛, 行路都痛.......今晚之後就用番攬枕和盡量左側訓, 真係好D。

今日出左尖沙咀, 又去睇CITYSUPER的ERGOBABY, 今次終於有個PROMOTER係度, 我地睇左一輪, 決定買, 但無黑色, 最後買左駱駝色和一個INFANT INSERT, 佢自動俾9折, 扣埋自己的CITYSUPER GIFT CARD少少餘額和匯豐咭回贈, 約千二蚊多少少。

http://www.ergobabycarriers.com/babycarriers/item/BC5S/

睇番市面上的揹帶, 一係X型揹帶, SLING, 或三百幾蚊的台灣貨, 一係八百幾的COMBI, APITA 同荷花賣的幾個牌子, 有好多人話X帶都幾好, 但COMBI就唔得。BABY BJORN和ERGOBABY就多好評, 最唔會累, ERGOBABY平過BABY BJORN少少, 而且可以揹到約4歲 (我諗都好少揹都咁大個), 所以買左呢個。

2月13日

今日去千色換番包尿布, 今次真係白白淨, 但呢家天氣開始潮濕, 希望快D有太陽可以洗野!!

剛買到的抽濕機都可以即刻用喇!

2月14日

情人節禮物- 係經理送的二手奶泵 - MEDELA Mini Electric, 新的要六百幾蚊, 佢已經用左佢2個BB, 但望落都OK, 唔駛錢當備用都好!! 佢叫我配番個咀, $50, 衛生D。

情人節無特別慶祝, 都係照常返99家吃飯。

2月15日

D人話要清胎毒, 今晚飲左腐竹蛋糖水, 之前開始間中飲芝麻糊, 好味!!

開工+BB物資 (30-31W)

年初七開工, 有同事俾利是B女, 好多謝佢地!! 有班咁好的同事, 對於自己要離職有少少慚愧......有D唔好意思, 可能快D同經理講會好D?!

繼續收BB衫, 除左經理最後一批外, 媽媽的朋友都俾一大袋我, 因為佢有男女孫, D款和色比較中性, 有D太舊我都無要, 唯有拎去回收, 揀D新淨和SIZE大少少的, 因為實在太多喇!!! 0-3M果D已經夠, 因為經理的女差唔多6M, 俾的都係細細件。要爭取有太陽的日子去洗衫喇!!

太多, 懶得影晒, 揀左幾件HIGHLIGHT

來自媽媽的朋友, 唔係粉紅色!!

 

來自經理的, 條格仔裙好得意, 襪仔都有11對!!

另外, 等到每月10號的萬寧會員日, 全場95折, 用PAMPERS張COUPON買定NB尿片2包, 淋浴露和洗頭水。

呢家唔知買唔買/買幾多奶樽及相關物品好..........

胎動越來越勁, 企係到都FEEL到, 但係打筋斗多過踢腳呢~ 有位同事的家姐一樣係四月媽媽, 佢的BB已經調左頭, 咁快?!! 好想快D照USG睇下BB的情況。琴日個下腹有少少唔舒服, 但唔係經痛FEEL, 自己都有少少疑神疑鬼呢。

第五次健康院檢查 (30W5D)

最後一日放假, 去健康院做檢查。約了最早的1:30PM, 姑娘差唔多兩點先開工, 但一開工又好鬼快就到我....

今次好緊張, 因為睇下自己有無重好多, 特別新年時候, 我自己覺得就唔係肥左好多。一上磅, 只係重左0.3kg!! 呢家58.9KG, 跟上次超重取個平衡, YEAH!

又係驗小便量血壓, 跟住好快就見姑娘量肚聽胎心跳。今次個肚29W, 無乜話好細。一聽胎心, B女就係到轉圈, 可能因為姑娘量肚時按到佢, 我自己都FEEL到睇到, 量左兩次都聽唔到, 唔知佢走左去邊, 姑娘話乜咁百厭, HEHE...最後聽肚臍位終於聽到。第一次俾姑娘搽到成肚都係O者喱。

佢同我計一個中等身材的女子全個懷孕期應重11.5KG, 但我已經重了10.9KG (根據憑記憶報上的懷孕前體重) ! 所以都係要選擇性食野........

因為上次入過院, 今次又要見醫生, 等佢寫紙我去醫院排期照超聲波。今次醫生一量肚, 佢又係到轉, 醫生都話見到佢郁。醫生問我有無咩擔心, 我話唔知佢有無升番上去, 醫生話要睇超聲波先知喇....

等左一陣, 拎番成份病歷, 要親身去醫院排期, 唔駛再去健康院喇。仲有少少時間, 聽左一陣母乳講座, 講的野都係差唔多, 最緊要生左之後黎健康院再教點樣餵........

之後就搭車去醫院排期, 排產科新症, 下星期四就有得睇, 個幾月無照超聲波, 好想快D照呢!! 希望個胎升番上去........

恭喜發財!! (30W)

兔年到了! 踏入最後倒數10周, 離B女出世的日子越來越近!!

今年放7日假 (有3日被迫扣年假), 由年三十放到初六...但只去了兩個屋企拜年 - 娘家和99家。年初二先返娘家, 可以離遠睇到煙花, 輝都係第一次睇, 因為以往年初二媽咪一家要出去拜年, 但今年唔駛喇...媽咪仲有派利是俾B女，hehe!

年初三赤口, 又係唔駛拜年, 我地去行元朗公園, 做下運動, 影下相。呢幾次行反而係腳累, 腰無痛, 唔知係咪條托腹帶有用呢?!

難得有時間, 當然係準備BB野
- 首先洗左紗巾和大部分BB衫, 入晒櫃喇。
- 拎個旅行袋做走佬袋, 欠D個人衫褲未放....
- 諗住買部日立15.5L抽濕機, 雖然元朗唔算好濕, 但下雨天都可以用黎乾衫
- 初二千色店派COUPON, $50送$10, 買左4包乾棉, 約$88, 平過平日特價
(原來我一向在SASA買的化粧棉都係呢個牌子, 但係無寫中文名, 呢家先留意到)

- 初四去CITYSUPER買揹帶, 點知PROMOTER無返工, 無職員幫到手, 慳番!! (上次一田的PROMOTER 真係PRO好多)
- 以為永安有ERGOBABY買, 行到去佐敦, 發現無。但呢間永安有好多BB野,做緊全場9折, 好多牌子吉之島都無, 見到之前話無貨的0/3baby摺床做DISPLAY, 諗住買, 但原來真係無得訂....
- 最後買左一包可洗乳墊和MIDES尿布SET (12條尿布+2條尿褲) , 買多2條尿褲和一頂帽仔夠$500做MIDES會員, 即時9折。
之前睇BK話MIDES都OK, 屬中價貨, 買黎試下, 等滿月之後先用。
點知回到家拆開黎睇見到尿布變黃左...可能放得太耐!! 打去問, 本來要返永安換, 但我話唔會出去, 最後搞左一輪都俾我係元朗千色的專櫃換包新, 但要個幾星期之後, 買野之前記得CHECK下!!

D摺位有黃色:

黎緊月尾如果去吉之島買齊D野, 可能唔駛去灣仔個BB展喇, 到時已經34W!!