Happy 100 days (15W)

7.23

今日BB 終於100日啦~~~~~

我地約左班親戚去錦田果邊飲茶, 因為太婆呢家係果邊的老人院住。

間酒樓好地道, 所以有點不衛生, 但也不能要求太高。食飽出發, 去到酒樓坐左一陣就扭眼訓, 夠鐘訓覺! BB一喊, 姨媽同舅母都叫唔好抱, 話喊下對果肺好, 真係有見地! 當然我媽就叫我快D抱起佢, 但我都無理, 因為明知佢眼訓就唔好掂佢。喊左可能10MIN, 真係訓左, 叻叻~斷斷續續都訓左1小時~

但我諗, 當姨媽同舅母有孫果時, 佢地可能忍唔到BB喊...

今次的重點係BB同太婆見面呀! 九十幾VS100日人仔, 太婆捉實BB腳仔, 好開心呢~

7.24

星期日. 輝的同學黎探BB, 另一位5月BB爸爸都帶埋果仔黎, 好熱鬧~

客人黎到BB訓緊覺, 無耐就醒左~抱佢出廳, 即時唔喊同周圍望人...跟住就肚餓喊, 餵完奶奶, 個心情都唔穩定, 唔知係咪唔鐘意太多人呢~定係未食夠未訓夠呢~喊下停下~

兩B合照, 相差約3星期, SIZE差唔多~人地隻B喊啦~

輪到我的B喊啦~睇下人地果頭幾大....

人地隻B的喊聲好細聲架, 原來我阿B真係惡D。唔知係咪因為奶粉B, 扭眼訓就餵水+奶咀, 好快就訓左....大家的湊B方法都好唔同!

仲有, 人地阿爸肯換尿片架~~

----

過左100日, 人地話百日哭, 我又唔覺有喊少左喎~~~~~WHY?

忙碌的周末 (14W)

周末仲忙個平日~

7.15

夜晚, 一班舊同事黎探我, 無上到屋企, 但約左係樓下好彩一齊食飯。BB好乖, 食飽飽眼仔碌碌玩, 如平日, 到9PM就扭眼瞓, 扎左一陣就瞓左, 但15MIN就醒, 我地食飯可以食到9:30PM。好開心, 好耐無同外人傾偈, HAHA, 變左宅女。

 

經理又送左一袋冬天衫俾BB, 好大件, 唔知B女幾時O岩著呢~其中兩件~

7.16

下午, 我地又揹住BB出元朗行~ 瞓覺時間先出街, 所以佢好快瞓左.....當佢呆呆想瞓時, 我開聲講野, 嚇到佢喊左幾聲, 真係膽小~出左去2HRS, 差唔多瞓足全程, 有進步~

一路都想買隻"朋友"俾BB, 行左一間樓上店, 買左呢隻公仔俾BB, 暫時佢得個望字無乜反應~希望會LIKE啦!!

同爸爸玩, 頭又抬高左DD喇~ 我地仲拍到BB大笑出聲, 好開心, 段片睇左N次都覺得好睇~

第一次大笑係6月26日朝早醒左, 痾左臭臭, 幫佢換完片後, 抱佢起身準備餵奶, 無端端咯咯笑~~ 跟住都無乜笑出聲喇........所以今次好難得!! BB應該一個不苟言笑的人....

7.17

今日, 一班樓友黎探BB。

好開心UPDATE下大家的近況, 又有一喜訊!! 希望快D到9月尾探CINDY BB

BB好俾面, 無乜喊, 雖然佢超眼瞓....但我地無放佢係房, 只係放低係HIGH CHAIR搖搖下, 佢瞓左20MIN到咋....平時要瞓2HRS....難為左佢添~

人走晒後, 食奶沖涼無耐佢就扭眼瞓, 放落床唔夠10MIN即刻瞓左, 叫左兩聲, 佢真係好累.......連爸爸都瞓埋....

我覺得到左3個月, BB真係好似懂事左, 知道有人探佢, 掛住玩唔瞓。

3個月啦

3個月啦, 話咁快~

體重: 屋企買左個磅, 可以抱住BB磅~ BB應該重10磅幾, 繼續跟生長線上升

身長: 59CM, 呢個月長左好多。

呢一個月, 開始識控制條頸~得閒同佢趴係CUSHION或自己心口玩下~

繼續吮手, 想瞓覺時吮吮下先瞓著, 夜晚我唯有幫佢帶手套, 驚佢吮得太耐...

食奶: 1日7次, 食20-30MIN, 臨瞓前果餐食晒兩邊, 要起碼1小時先瞓得

睡眠: 日間小睡3次, 自己瞓, 通常都有2HRS。但第3次近煮晚餐時間, 屋企比較嘈, 有時佢都瞓唔到, 無晒辦法......到9PM一定扭眼瞓, 但瞓得15MIN又醒, 唯有食奶先大覺瞓。

夜奶: 無進步。11PM前瞓, 4點幾醒一次, 有時6點幾又醒, 食飽又瞓過, 跟住7點幾8點幾真正醒晒, 呢餐我定為一日的第一餐。半夜有一兩次EE OR OR, 但聽得出係會瞓番, 唔係肚餓, 但我俾BB嘈醒就好難瞓番, 好慘.

希望4個月時可以戒夜奶, 等佢夜晚一氣呵成咁瞓啦~

而我自己, 雖然日日如是, 但又唔覺悶~BB瞓時我就食早餐、午餐, 小睡, 上網, 好快就一日喇~

 

報幼兒園? (13W)

相中的BB著左呢件衫, 好似幼稚園生!

呢排得閒, 兼且自己是全職媽媽, 教育小朋友是自己份工, 開始睇下BB讀書的野!

呢家好多怪獸家長, 唔係講笑, 好多201104媽媽已經幫BB報左N班, 特別係救世軍的, 因為佢地用"蒙特梳利"教學法, 而報名手續好簡單, 只須$10。

元朗都有一間救世軍, 但係錦田, 太遠喇! 否則, 我可能都幫BB報左名先~

BB讀邊間幼稚園好? 屋企樓下有一間太陽島, 幾千蚊一個月, 負擔唔起!

幼稚園推介REF: http://www.uncledos.hk/blog/?page_id=3878

另外, 咩係"蒙特梳利"? 懷胎時都睇過少少資料, 仲借左本書, 可惜借左之後就生得, 本書無睇過就還左........呢家好流行, 著重小朋友的自理能力, 體驗多過言教, 亦唔主張用flash cards.

仲有小朋友讀唔讀N班? 但N班無學券, 幾千蚊一個月, 邊有閒錢呢~唔上N班可以去上PLAYGROUP, 但全職媽媽自己教係咪仲好呢?

我會唔會係怪獸家長? 我諗唔會。希望小朋友係一個獨立, 又自理能力高的人, 好似我細個咁!哈哈!

 

硬頸BB (11-12W)

呢兩個星期, BB繼續研究自己的雙手, 望下佢食下佢, 有時仲雙手重疊, 好似祈禱咁...

試下睇下拿唔拿到東西...其實未得, 不過咁O岩佢捉蟲喎! HEHE

時不時拎D新玩具俾佢睇, 呢期佢LIKE 蟲蟲, 色彩夠鮮豔呀!

最重要的發展係條頸開始硬喇, 我每日都同佢做下運動, BB都FING到幾下...

條貴價揹帶只係屋企玩過, 成日驚佢條SPINE未得, 唔好打直揹, 雖然話係專登設計俾初生BB。前兩日又揹下, 今次BB條頸硬左D, 仲望住我添, 好SWEET

 

幾時先可以同BB出城呢? 出街最怕佢扭眼瞓喊, 如果坐緊巴士喊點算, 坐西鐵都可以落車丫....

老人家話"百日哭", 希望過左100日會喊少D, 到時, 我想

- 返娘家, 順便可以探下D舊同事

- 探朋友的BB

- 探BB的太婆

- 放假全家人去行遠D的街, 食好野

 

The Power of Technology

雖然懷胎時無影4D, 但照結構時影到BB的輪廓, 真係差唔多!

照結構 (2010-12-05)

BB (2011-06-25)