BB衫+淘寶收獲 (29W)

呢個星期, 經理開始陸續分批俾D BB衫我, 真係好多, 有D比較舊, 有D都幾靚架。除左一兩件, 全部都係0-3M著, 我應該都唔駛點買衫喇。

總共有8件和尚包短底衫, 4件第二層著的長包PAT PAT衫, 3件蛤蟆衣, 1件外套, 1條連身裙, 1件羊毛衫, 1張包被和1塊薄被 (唔知有乜用), 過年可以開始洗喇。

1月29日  淘寶大豐收

今日一朝入大埔去FEON屋企睇我地4位太太的淘寶收獲, 好耐無見我的大肚樓友CINDY喇。

呢D係我地的收獲 (有一位太太唔得閒):

大家一齊買, 就係可以睇多D野的質素如何, 下次可以加訂呢。分享下大肚經驗, 臨走仲影埋張7, 6, 5 個月 (由左至右)的大肚照。

我的收獲: 30條紗巾, 襪, 肚圍, 尿墊, 餐墊, 仲有游水貼紙耳仔的貼 (呢樣比較無聊, 只係RMB3)...最靚係襪仔.

買俾自己的有: 哺乳BRA (回家發覺欠一對乳墊!!), 2件出街哺乳衫和1套哺乳睡衣。咁就買左差唔多HK$500!! 

但左下角件相同淘寶張相都有D出入, 收到都嚇了一跳.....原來我揀左呢件?!

之後出沙田行下一田和其他BB用品店, 睇左ERGO BABY過千元一條揹帶, 的確唔錯呢, COOL住腰部, 同行山BACKPACK差唔多, 揹住BB就唔會肩痛腰痛.....好想買。

第四次健康院檢查 (28W5D)

1月24日   公司團年

半夜醒來數次, 每次醒來B女都在踢, 踢的位置還很高, 在胃的下少少, 原來個胎真係好大, 點解半夜咁活躍?

晚上經理請食飯團年, 去了尖沙咀食新羅寶韓菜, 都幾好味, 仲食到好飽......D胃氣頂到第二日都無完, 為食之過。

1月25日 健康院檢查 - 肥媽        28W5D

下午請假去健康院檢查, 因為胃太脹, 匆匆吃了在海皇吃了菜乾排骨粥便去 (粥味道都唔錯)。早了10分鐘, 留小便, 驗小便, 無事。量體重, 58.6kg!! 比一個月前重了3kg,  護士問我有無脫外衣量, 梗係有啦。

之後等量肚和心跳, 肚又係話我細左少少, 今次細2星期。問我有無水腫, 我話有少少, 因為手腳好似大左, 佢話邊有水腫, 只係肥!! 

等左一陣見第三位姑娘, 佢講解番小便無蛋白, 但體重重得太快, 應該周重0.5kg, 但我超過了, 仲要我講出每餐食乜食乜........

早餐: 麥皮, 脫脂奶

早午茶: 公司肚餓會食餅乾

午餐: 帶飯, 飯比以前多

下午茶: 水果

晚餐: 在家吃, 飯也比以前多

總結, 佢話看來是碳水化合物太多, 會轉為脂肪, 給身體準備母乳。佢要我食D飯, 肚餓可改吃紅豆沙, 綠豆沙不加糖, 又飽肚又高纖.....兩周後看體重有沒有受到控制,  如果都係咁肥可能有病 !! 當然除了正餐, 我有時都食左朱古力, 出街食又會食多左......仲有近排有多左蛋, 姑娘話孕婦每周只可食三隻全蛋...

之後, 我報埋產前母乳實習班, 下次8/2 覆診後可即刻上堂, 健康院都幾好安排呢。

等一陣再見醫生, 醫生再用尺度我的肚, 又聽多次胎心跳, 正常, 仲讚B女活潑 (客套話?!), 頭先細左可能係B女位置問題...但提醒我要多菜少肉, 又唔好刻意減肥.....

呢兩個星期真係好積極控制食量!!

周年紀念, 母乳講座 (27W)

呢個星期剛出了雙糧, 但已經花了很多錢購物...買BB野和辦年貨。

1月21日 食大餐

今晚出街食, 慶祝拍拖紀念和預祝結婚一周年。在元朗吃意大利小店, 之前去食過LUNCH都好好味, 今次叫西冷和墨魚意粉, 西冷好LUM, 但牛肉唔敢食太多。

1月22日  母乳分享講座

今日去聽母乳分享講座, 星期三先報名, 只剩7個位!! 報名費可用作之後去樓上店買野, 當然又有一大包試用裝。

由三位全母乳媽媽主講, 有D事已經上網睇過, 但聽都係比較入腦。授母乳的媽媽如果要返工一定好麻煩....我幻想如果我要返工都唔知去邊泵奶...個雪櫃又夠唔夠位放呢。但正如講者所講, 人類係哺乳類動物, 98% (2%患病外) 都可以授母乳, 希望我都會成功, 唔好咁易放棄。

之後同大肚朋友一齊行左一陣吉之島, 原來真係2月尾先有BB節, 又要等.....最緊要係張木床。

經過荃新天地的RAPEE LIVING, 有套床品套裝好靚, 折左都要$720, 好貴, 而且無我地想要果款....BB床上用品, 主要係有卡通人物或0/3baby Peter Rabbit 的選擇, 但我又唔想用卡通人物。

今日終於收到第一次淘寶的收獲, 口水肩真係好靚呢,  只係RMB6.8/pc, 夾埋D贈品, 總共有6條口水肩喇!

1月23日 買床舖

為了慳錢, 好多野都要等特價先買, 呢排都係得個睇字。

上網睇過原來AUSSIO呢間床品店都要BB床品, 於是今日去左天水圍的分店睇! 做緊大減價, 原價$899, 呢家減到$450, 三百幾針的床舖, 即刻決定買喇!! 仲買埋床單2張替換, $99....好開心, 終於買到野喇, 仲可以早D洗乾淨。

(原來淘寶都有得賣, 但計番同香港差唔多呢!!)

購物 (26W)

近兩星期隻手指好似腫左DD, 結婚介指都有D緊, 所以無帶喇。為了避免水腫, 夜晚都要KEEP住做產前運動, 還要"LONG"高隻腳訓, 第二朝好似真係無咁腫。

呢兩日好乾燥, 個肚特別係橡筋位好痕, 有少少紋出現了, 唔知係橡筋紋定係妊娠紋, 皮膚太深色都睇唔清...

1月12日 食飯

今日中學同學POPO結婚派帖, 佢未婚夫公司有做奶樽, 好好送左5個俾我。其實我未諗買奶樽住, 買都係買CHU CHU, 但佢話呢個係美國銷量第一, 我要研究下好唔好先, 但都好多謝佢!! 

有人話大肚唔可以去人地喜酒, 我地都唔信, 下個月去飲, 我的肚一定好大喇.......

1 月15日   出手

星期六, 出了去尖沙咀行街。去睇下BAZAAR, 都無野O岩, 仲發現淘寶D野真係平好多, 一模一樣的!! 

都係睇番D貴野, 行左2個鐘, 腰痛.....精打細算下終於出手買左D野俾B女....

1. KINGKOW 睡袋, SALES話可以用到12M, 特價7折。唔太厚, 應該出世時開住冷氣可以用。

2. 馬莎買的特價衫, 0-3M, $50, 見佢平又靚所以買。

3. MOTHERCARE 手套2對, 初生用, 唔會俾指甲弄損自己

想買和尚袍底衫, 但MOTHERCARE和馬莎都無晒SIZE。

1月16日 整理

今朝執好左廳的櫃, 全個櫃都係俾B女的, 應該夠位放啦! ...............呢家暫時得好少野。

呢幾日都好努力淘寶, 4個大肚婆一齊夾份淘, 辛苦要整合的朋友!! 希望咁多花款, 賣家唔好出錯, 好想快D收到!! 

開始準備 (25-26W)

這個星期肚越來越大, 肚圍已有38", 有時食飽左,肚仲會好脹。

上星期六, 搭地鐵出城, 平時都好少搭地鐵, 呢日著左作羽絨和裙, 居然有個男人讓座俾我!! 好難得.....照鏡望下自己, 留心睇, 特別係著裙時都會見到我係大肚婆。同事都話終於見肚喇。

踏入第6個月, 仲有3個月就期滿, 開始要認真執走佬袋及BB物資。

BB衫, 經理話執2袋俾我, 會車入元朗俾我, 但唔知幾時先俾....

開始執下個櫃, 專放BB用品....

打開左張2手high chair 試下...

另外, 開始淘寶零碎的BB用品。

最近HSBC咭有優惠, 去萬寧買滿$400有19% off, 買左D COUPON, 慢慢用黎買走佬用品和尿片.....下星期要買多D用黎買過年禮盒。

2010

每年都要寫番D回顧和展望.

2010年

1. Change marital status to married -  完成, 估唔到仲會做準媽媽

2. 工作可更得心應手, 表演好一點, 建立歸屬感, 敬業樂業。不要太多ot, 可以早點放工回新的家!! 都OK, 公司唔太多OT, 過去一年仲好好彩可以去法蘭克福和賭城出差, 近的都有廣州和澳門, 但出TRIP太辛苦, 都係唔好搞我.....

3. 做運動 無乜..........有左之後更少

4. 儲錢 都係習慣地儲, 慳得就慳, 今年無遠行, 無乜大洗

5. 在新居安頓好 and enjoy 待續

6. Honeymoon - unknown 去了沙巴, 好好玩! 下次都唔知幾時先可以再去旅行

7. More baking 上左兩期面包堂, 自己都識得做包, 希望第時都有時間精力去做

2011年

1. 做媽媽- 生時會有幾痛, 第一個月無得訓會有幾辛苦, 餵母乳得唔得......希望雖然辛苦但會享受, 好想快D見到B女!! 

2. 做全職媽媽- 這個決定一點也不容易, 仲唔好肯定, 但又似乎已經決定了。如果要工作, 最重要係份糧, 事業心一向都是零, 亦沒有理想, 只要放得下$$, 就可以決定了。

3. 做超級慳家師奶- 基於第2點, 要慳, 從現在開始, 還要諗D方法搵收入

4. 不要和社會脫節 - 做師奶唔知會點, 一日在家和對住BB, 雖然做師奶, 但都要充實自己

第三次健康院檢查 (24W2D)

12月28日 24W2D

今日係最係一日假, 去了健康院做第三次檢查。一上磅, 55.6KG (122LBS) 跟上星期在私家的重了0.5LBS, 希望唔好重得咁快。

跟住又係量血壓驗尿, 再聽胎心, 姑娘用把尺打直度我的肚, 話我的肚細左少少, 我話照超聲波都係細左幾日, 佢即刻好似好高興咁, 因為自己連用尺度都知.....

等見下一位姑娘的時候, 見到好多初生BB來睇新症, BB真係好細粒, 天氣凍包左好多層但又要除晒衫去量重量, 我過多幾個月又係咁....

見下一位姑娘, 原來前一位MARK了我的SIZE是22-24周, 細左少少, 但佢話無事, 唔駛見醫生, 我交埋上次留院時的信, 佢話呢家無事就得喇....

返到屋企個幾鐘後, 健康院打電話來, 我認得係那位女醫生, 她問我醫院的檢查和提醒我要小心, 如果再見紅就要入急症。而下次覆診 (28W) 時如果自己無照私家, 佢會安排我30W去醫院照胎盤的位置, 睇下有無升上去......希望B女快D到位啦, 千奇唔好開刀。(原來健康院的醫生會睇番我地的FILE呢)