今日BB個半月大, 好好天, 我地去99家吃晚飯, 自生產前一晚起, 我已經有個半月無返過去啦!!
BB換靚衫出街喇~~ 首先我地係平台影下相
第一次搭西鐵的BB
去到99家放低佢, 即喊
跟住全晚都有人包, 只係想食時喊左陣。全晚幾兩小時都好乖, 眼仔碌碌打呵吹都唔肯訓覺, 對爺爺屋企好感興趣~~逗得爺爺女麻女麻好開心~
"好想訓覺呀...."
"呢到邊到黎?? 我又想玩~~"
懶玩精一名~~~~
2011年5月28日 星期六
2011年5月27日 星期五
先苦後甜的奶媽生涯
day 41 - 流口水
餵母乳, 其實幾適合我懶惰的性格, 因為又唔駛沖奶, 又唔駛洗奶樽, 話食就食, 幾方便。對BB又好, 真係希望佢少D病痛, 大人都舒服D。
有一次去醫院抽血驗黃疸, 餵奶房同一位媽媽傾計, 佢已經係第3個B, 3個都餵人奶, 真係好叻!! 佢話最初, 餵人奶係好多眼淚, 仲鼓勵我, 最艱難是頭十幾日, 只要捱過, 就會好順利。
困難一: 受損
雖然醫院對奶媽完全唔SUPPORT, 但健康院就好好多。第一個月, 我總共去了6次母乳指導先”畢業”!! 初時姿勢唔正確, 乳頭受損, 情況是乳頭和乳暈之間裂開了, 想像得到嗎? 左邊嚴重, 右邊好一點, 痛到………
第一次去母乳指導, 姑娘好好, DAY4開始谷奶, 教我煲蒲公英+碌柚皮的渣來熱敷 (呢家我都懶, 如果熱敷用水算…), 鼓勵我有心餵, 就要努力, 情況唔係太差。我當時先醒覺要一日餵12次, 約2HR一次, 因為初生B懶訓, 訓緊都要整醒佢…
之後的指導, 因為BB重得唔好, 因為我的傷….每個姑娘的做都唔同, 乳頭保護器有人話好有人反對, 最後我都忍痛無用, 真係好似好快左….最緊要係傷口搽人奶風乾, 係屋企唔駛戴BRA, 姿勢要保持正確, 最後傷口都差唔多滿月先好返。
困難二: BB未大 feed on
schedule
另一個苦況係BB未人, 唔識控制佢把口。因為BB有黃疸 (呢家都未退, 醫生話最長6個月!)，都話要feed on schedule，訓緊覺俾人整醒叫食奶當然發惡。因此，每次餵奶好似同佢打交咁，佢減都拆天都未有得食, 有時要老公捉住佢隻手先得，加上我好痛，心理和生理障礙令到餵奶好辛苦。。
但到左差唔多滿月, 我的傷口好返好多, 同BB大個左, 識控制自己把口, 呢家唔駛3秒就餵到。滿月後, 因為佢黃疸唔係肝的問題, 體重OK, 我就變 feed on demand, 佢叫先食, 最多3小時食一次, 半晚又係佢叫先食, 舒服好多…
講起姿勢, 之前聽講座講得好簡單, 實在太簡單! 睇姑娘的手勢 (佢地可以按BB個頭落我的奶奶食…) , 加上上網狂做RESEARCH, 發現最緊要:
-
必要: BB咀要大含得深
-
唔係話放就放, 因為BB未大, 要自己乳頭對住佢鼻乳, 等佢的口張大, 就下巴先放到乳暈邊, 再兜上去, 可以進一步張開佢的咀, 同確保係咀唇外翻, 張咀俗稱”蝴蝶咀”。
-
外國網頁好詳細:
-
http://hk.myblog.yahoo.com/wedding_blogger/article?mid=33144
不過BB呢家6W, 呢家我叫”奶奶”, 佢已經唔喊都識望住我啦!!
黎緊仲要煩驚變左人肉奶咀, 戒夜奶…有人奶B一歲大半夜都要叫奶奶, 希望我B唔會咁啦….
2011年5月20日 星期五
0個月SNAPSHOTS
DAY 2 在醫院, 似隻粽
DAY 4 幾似爸爸
DAY 6 開左少少眼
DAY 9 傻傻地
DAY 13 個頭都唔細
DAY 14 訓覺自己YOUNG都咁
DAY 22 眼睫毛出來了
坐月後
坐完月, 叫做開始做全職媽媽, 暫時是日間時份, 因為有BB落唔到街, 夜晚果餐都係99過來煮...
全日24小時對住B女, 漸漸都摸清楚佢的脾性。
呢家日頭9AM後佢多數唔訓, 眼仔碌碌, 自己玩最多30MIN就叫人抱, 抱抱下唔知點解大叫, 估係肚餓, 雖然餵左奶無耐, 但搞佢唔掂, 都係俾個人肉奶咀最食, 咁佢又就係食架喎....所以我最好9AM前就食完早餐, 唔係就要分段食...
食完早餐, 襯佢唔叫就要開始準備午餐, 好彩的話, 餵完1PM果餐, 佢會訓覺, 咁我都有餐安落飯食, 上下網, 仲可以訓一陣...........
之後可能佢又醒過, 又要服侍佢, 跟住同主人沖涼, 咁到6PM , 99到, 我就可以沖自己的涼...
食飽晚飯, 喊唔喊都好, 交俾佢的爸爸照顧1小時, 我就要訓番一覺, 準備半夜對佢玩....
好彩的話, 佢玩到1AM會訓, 咁半夜起兩次身餵奶, 我都唔係咁辛苦。
第二日的循環又開始過。
第時我要煮埋夜晚, 都唔知點搞...
2011年5月16日 星期一
開始做奶媽
懷孕時決定一心餵母乳, 除了是為了BB的健康, 還可以慳奶粉錢。但餵母乳一點也不容易, 幸運地, 憑著決心和毅力, 除了在醫院有飲奶水外, B女做了全人奶BB一個月啦~~~~~
餵人奶, 實有好多微言。媽咪99都怕我辛苦, 咁痴身, 點解唔餵奶粉, 可以交俾人餵, 又唔知左幾多…連輝的上司都叫我補奶粉, 因為BB肥D, 有病都捱得住, 我當然唔聽~~唔係用抵抗力去抵抗病魔架咩, 點解用脂肪?? 連輝都叫我補奶粉, 或者PUMP出黎餵……..但我唔想用奶樽, 驚乳頭混淆。
食飽的BB
第一次餵哺
根據事前研究, 第一次餵哺要在生產後1小時進行, 讓BB吸吮初乳, 刺激奶媽造奶。我一生完, 回復清醒, 便要求護士讓我餵母乳, 護士要我吃完早餐先, 來回叫了3 次, 終於給我餵啦, 當時是7:30AM, 已生產了1.5HR!
之前雖然看過餵哺姿勢, 但做起來當然是另一回事。產房那位護士首先她幫我試左邊, 我叫好痛, 驚損, 換右邊, 其實都痛, 但KEEP住給BB吮了10MIN, 算是完成了第一次餵哺。我猜當時乳頭已經損了一點…
在產後病房
四月旺丁, 產後病房超過50人, 我初時要訓走廊, 到下午才轉到病床。上午, 醫院已動給BB餵了3次奶水, 下午, 有護士問我是否餵母乳, 便拿BB給我訓係到餵, 因為未落得床, 有個護士幫手睇姿勢, 今次係左邊, 依然好痛, 但忍住餵了20MIN, 我猜當時乳頭又損了…
之後, 佢地會拎BB俾我餵, 但無人理…所以我都係估估下, 因為痛, 餵5-10MIN, 就飲1OZ 奶水…..有兩個朝早, 都有母乳姑娘問下情況, 但佢地太忙, 唔會睇住你餵成點….但叫我損都要餵, 仲教我用人奶搽乳頭。
有一次, 我問一個似護士長的人可唔可以有姑娘指導下,
但換來只是要我將乳頭放入D, 口要大….我都知….
初時連換片, 睇尿濕指示、掃風都唔識, 都係半夜行出去, 有阿姐教。我諗, 如果無行出去, 佢地都唔會理你…
因為痛, 叫輝拿來事先買的羊脂膏, 搽左希望好D。
回家
決心餵母乳, 星期六, 回家後無食過奶粉, 痛下痛下咁餵。醫院都2小時餵一次, 唔知點解, 返到屋企, 我記錯左, 變左3小時一次, 小便唔多….
臨出院, 叫輝幫我問了乳頭保護器諗住用….但個形狀太誇張, 用唔到, 放埋一邊。
終於到星期一, 第一次去健康院, 救左我呢個奶媽…….
(待續)
2011年5月14日 星期六
生產記 (40W)
BB滿月了!! 要陸續記下這個月發生的事。
---
4月14日
續上篇, 倒數到最後一天, 除了一點見紅外, 其他動靜也沒有。假宮縮在晚上好像有一點規律, 約20MIN一次, 但感覺一點也不是”痛”。如常11時多便上床睡覺。
睡夢中突然感覺下體有一股暖流湧出來, 即刻彈起身, 衝去浴室, 以為是穿水。一看, 是血, 隨即有些東西跌了出來, 但看不到是什麼。輝也驚醒了, 問我乜事, 決定入院, 看看時間, 只是半夜12:15。
即刻拿走佬袋, 落樓剛有的士, 15MIN就到達屯門醫院。因為過了晚上9時, 我們直接去產房報到, 當時我一點陣痛感覺也沒有, 行得走得, 我們連相機也沒有帶(!!), 以為有排等…….
入到產房, 有另一位產婦做檢查, 是國內人。我要等一會, 輝便去辦入院手續。等的過程知道那位產婦也是見紅, 她問助產士要等多久才生得, 助產士答可能2-3天, 因為她沒有穿水, 陣痛……..我想, 難到我也要等2天??
到我檢查, 助產士問我預產期時, 知道正是4月14日, 有少少驚訝呢。檢查發現 (這個檢查真的有點痛), 原來我已開了3度!! 預計5小時內可生產!! 問我點解我無陣痛, 咁忍得痛?? 於是我可以直接入產房待產………輝回來收拾好我的行李放入LOCKER, 我便被推入產房。第一次躺在病床上, 望著輝慢慢消失, 感覺很難受。因為預計只需5小時, 輝便在產房外等我開到7度, 當時1AM。
入到產房, 有兩張床的。助產士為我駁上儀器CHECK胎兒心跳和陣痛的頻率, 當時只係等……有時B女動作太大, COOL住接近胃的儀器弄得我很痛。助產士想幫我穿水, 怎知鉗了一會, 她說我已經穿了水!! 只鉗到BB的頭髮! 問我何時穿水, 我不知道……..我心想原來BB有頭髮呢。
期間三次不同的醫生來檢查, 每次檢查那個度數都很痛, 過了2-3小時, 都只是開到4-5度, 但當時終於感覺到陣痛。陣痛的感覺很難形容, 總之是令人”典床典席”都忍不到…..唯有等陣痛暫時停止。
到約3AM, 醫生說我的陣痛”痛得不好”,我覺得是15MIN一次, 但她要求是5MIN 2-3次, 於是要我用催生藥。有位男護士來幫我在手背的位置吊催生藥, 我猜還吊了鹽水…
另一位助產士問我要不要叫先生回家等等, 因為下了催生藥也不知何時生產, 於是我用產房電話找輝, 但他決定繼續在外等…。
好像過了1小時, 催生藥開始發生效用, 陣痛加劇, 我要屈膝, 拎左拎右, 用之前學的呼吸法去捱過陣痛的幾分鐘。助產士不時會來檢查度數, 她叫我覺得好急大便時便叫她。有一次我急得好厲害, 叫她過來, 她說看來該未夠度數, 問我要不要檢查, 我拒絕了, 因為檢查都令人很痛。胎兒明顯低了, COOL住胃的帶也越來越鬆。
這時, 鄰床來了一位國內婦人, 又是開了3度, 但她的BB要落到好低, 令她好急大便, 但因為未夠度數所以唔痾得…..她大叫大嚷, 說要止痛藥, 但助產士說這時不可用止痛藥, 會影響胎兒呼吸等等, 嘈左好耐, 助產士還叫我學下我, 唔好叫。我聽到她急到落了床, 蹲在床邊, 還在床邊吐痰, 之後道歉, 因為忘了自己在香港。雖然我好痛, 但”聽”到呢個產婦的表現就係幾搞笑。我還問助產士為什麼她開3度, 但胎落得低, 她說人人不同, 而且她後生, 24歲, 後生係唔同D!! 她還跟同事說, 這兩位產婦應該是差不多時間生。(結果是她比我晚25MIN便生了)
期間我都不想忍, 學人家問助產士我可不可以要止痛藥, 佢都唔俾, 因為話我差唔多喇!! 到約5:00AM, 越來越急大便, 因為助產士在鄰床那邊, 我要大叫好急…..突然說我開到9度, 輝可以入來了, 她們亦將床改裝成產床準備。我問我痾得未, 原來可以了! 兩位助產士見慣場面, 站在床後傾偈, 還說去韓國旅行, 輝在一邊捉住我的手, 忘記了他說什麼, 當時我叫他閉咀, 因為我好急好痛, 唔想有人嘈!!!
繼續深呼吸, 痾了幾下, 當時急多過痛, 她們終於過來了, 極急舖好一大張消毒的紙, 叫我們不要觸到…..叫我痾, 再打止痛針, 一剪, 再痾, 差少少, 再來, BB就出來了!!! 時間是6:05AM! 體重是2.81KG, 助產士要我們緊記這兩組數字。
BB給人抹淨過後, 拿過來給我們看。我望見她, 叫了一聲BB, 這就是我們的BB!!助產士問我們BB性別, 當時我剛生完, 腦還一片空白…….只是跟輝答是女仔, HEHE!
生完仔的感覺是如釋重負, 全身即時鬆晒。生仔真的痛和急到人都顛, 幸好真的是助產士所料的5小時, 痾也只是30MIN的事。
BB第一張相
我們影全家幅啦
~
訂閱：
文章 (Atom)