入院。在家安胎 (22W幾)

12月15日 產前運動堂

今天下午請假, 去參加醫院的產前運動堂, 由物理治療師主教, 堂費$100。未夠鐘, 去食BURGER KING$10套餐, 真係抵食呢。去到總共有11位MAMA上堂, 坐在地上做簡單的伸展活動, 練習會陰肌, 腹肌等生仔會用的肌肉, 防之後失禁, 學生產時的呼吸, 都幾有用。物理治療師還分享她生3個小孩的經驗, 知道點樣用力...

12月16日 入院

半夜突然醒左, 感覺到肚好實, 去TOILET, 見到有少少紅, 呆了。但半夜三間, 這晚又只得幾度, 點算好? 決定明早即刻去睇醫生。但餘下幾小時好似都無訓過, 肚側又有少少扯住, 好緊張, FEEL到胎動才放鬆D, 好不容易等到天光, 出發去急症室。

自己去急症室, 8AM, 無乜人, 第一次入急症, 乜都唔識。唔理咩事, 第一樣俾$100, 之後去分流站, 再見第一位醫生問咩事。等左15MIN便見第二位醫生, 後生仔, 問咩事後帶我去照超聲波, 碌左一陣, FEEL到好唔熟手, 話BB無事, 見到心跳 (照果時我仲知BB踢左兩下)。之後檢查下體, 好痛, 見到佢抽出黎果下有少少血, 話子宮頸有少少出血。應為流血, 所以要留院檢查, 等婦科醫生再看。我問要等幾耐先見到醫生, 佢話好快。

9AM上婦科病房, 姑娘量血壓體重體溫, 115LBS, 換病人衫, 上床等。幸好是醫生巡房時間, 等左一陣就有位後生女過來問我咩事, 按下肚就走了。過左個幾鐘, 見到剛才的醫生跟住另一位女醫生巡房, 用英文報告各病人的情況, 終於到我了, 又問, 再按肚, 之後話一陣幫我照超聲波檢查。

好快就檢查, 今次明顯女醫生熟手好多, 見到BB正常, 量了長度:

頭直徑53MM (22W), 大腿骨37MM (21W)

醫生照時仲問下我行情, 問出面做結構幾錢, 一次私家檢查又幾錢, 包D乜咁....

再檢查下體, 今次都好痛, 但再見唔到出血。診斷結果是胎盤近子宮頸, 但多數會遲D升番上去, 要再留院觀察。果時我都一D都唔緊張, 只係唔知要留係到幾耐....

回病床, 打電話俾家人和經理報告, 經理話佢之前又係5個月都試過咁, 仲有塊血, 但都無事, 仲話叫醫生俾佢早D出院, 我聽左都放心好多。到差唔到12NOON, 我已經好肚餓, 第一次住院都唔知有無飯食, 問阿嬸, 原來有飯派！

病人餐就的淡而無味, 食晒後, 有電視睇。無野做, 而且琴晚無訓好累, 好快就訓著。但周圍好嘈, 阿嬸執床, 其實我又無人理, 我都唔知下次幾時可以見醫生, 好想出院!! 因為我覺得無出血已經無事....

捱到5PM, 走出去問姑娘, 佢話今日無醫生來, 我想出院回家休息, 佢話叫醫生來同我傾。等左一陣, 有個高大的女醫生來, 佢講野好大聲, 全間大房都知我咩事入來, 又想出院....佢解釋我的情況, 要觀察24小時, 到聽日無出血無肚痛就可以出院, 但我亦可簽自行出院, 我好想出院, 唔想係醫院過夜, 天氣凍, 如果我過夜, 又要家人帶日用品過來。最後佢話出血, 只可以俾3日病假我...OK...等輝來接, 終於可以回家了! 

返到屋企舒服好多, 雖然只係住左大半日醫院, 但都好唔想住, 到時生時唔知會點呢...

星期五, 媽和姐都過來探我, 服侍我兩餐, 分泌仲有少少色, 好擔心, 整日都卧床, 用iPAD 在床上SEARCH下, 其實50%出血都係無原因, 只有休息卧床。除左有少少扯住痛, 仲有果肚時不時"拿實", 突起, 宮縮, 唔知正唔正常。今次比上次9W時作小產擔心好多, 可能因為BB已經咁大個, 同埋今次持續了一段時間....

星期六, 奶奶來服侍我, 輝放假, 有人陪開心好多, 身體好似好番少少, 希望星期一可以返工。

星期日, 終於無色!! 心情都好D。