吃花膠之過?

估唔到近5個月都要去母乳指導。

9.12

中秋節。

話說上星期二食左隻花膠, 諗住D奶會杰D, BB會肥D。唔知關唔關事, 星期四晚一邊突然好谷, 好似初時餵奶谷奶咁實晒.....BB食左60MIN先清晒

之後星期六見乳頭出現白點, 印象中係塞左咁解...餵果時好痛呀! 可能之前痛得多, 呢次都忍到。另一白點原因係有真菌感染, 但會十級痛, 我諗我唔係啦。

到星期一朝早, 猶疑去唔健康院搵姑娘幫手...自己膽粗粗用針挑, 挑下層皮, 唔得。於是打電話去健康院, 佢叫我即刻去呢~今朝有母乳指導。

去到等左陣, 有得磅BB, 好開心! 5.56KG, 升番上3-10%條線。

等姑娘, 又係果位頭一個月第一次見我的姑娘。佢認得我呀...佢話"咁大個仲黎?" , 我話有小問題....

到我入去啦, 有好多初生BB的媽媽呀, 全部BB都好細粒, 好得意!! 成舊飯咁唔郁食奶奶架, 聽到其他媽媽的問題, 我都經歷過, 勾起我的回憶, 只不過係5個月前! 我果個雖然細細粒, 但比較下好大舊。

關於白點, 姑娘問我有無挑過, 我話有呀, 但唔得。我餵完後佢就出手, 挑到出血呀, 唔怪得我挑唔到啦~~ 痛到我出唔到聲叫痛。姑娘話等BB吮下就無事。

過左幾日, 粒白點仲係度, 但餵果時就無咩痛喇....

唔通我真係唔食得花膠?